IND vs ENG: ઇંગ્લેન્ડે એજબેસ્ટન ટેસ્ટ સાત વિકેટે જીતી, શ્રેણી 2-2થી ડ્રો રહી; તસવીરોમાં બેયરસ્ટો-રૂટનો આકર્ષક દેખાવ
ઈંગ્લેન્ડે બર્મિંગહામમાં ભારત અને ઈંગ્લેન્ડ વચ્ચેની છેલ્લી ટેસ્ટ 7 વિકેટે જીતીને ઈતિહાસ રચ્યો હતો. આ જીત સાથે 5 મેચની ટેસ્ટ સિરીઝ 2-2 થી ડ્રો થઈ હતી.
ભારતે ઈંગ્લેન્ડને 378 રનનો ટાર્ગેટ આપ્યો હતો, જેને યજમાન ટીમે માત્ર ત્રણ વિકેટ ગુમાવીને હાંસલ કરી લીધો હતો. ઇંગ્લેન્ડ તરફથી બીજી ઇનિંગ્સમાં જો રૂટ અને જોની બેયરસ્ટોએ શાનદાર પ્રદર્શન કર્યું હતું. રૂટે 142 રન બનાવ્યા અને બેયરસ્ટોએ 114 રનની અણનમ મેચ વિનિંગ ઇનિંગ્સ રમી. બંનેએ ચોથી વિકેટ માટે 269 રનની ભાગીદારી કરી હતી.
ઈંગ્લેન્ડે ટેસ્ટ ક્રિકેટમાં પોતાના સૌથી મોટા રનનો પીછો કર્યો છે. ઇંગ્લેન્ડે આ પહેલા ક્યારેય ટેસ્ટમાં 360 રનથી વધુના લક્ષ્યનો પીછો કર્યો ન હતો. તે જ સમયે, ભારત સામે પ્રથમ વખત, કોઈપણ ટીમે 340 રનથી વધુના લક્ષ્યનો પીછો કર્યો.
જો રૂટ ફેબ 4માં સૌથી વધુ ટેસ્ટ સદી ફટકારનાર બેટ્સમેન બની ગયો છે. આ મામલે તેણે વિરાટ કોહલી અને સ્ટીવ સ્મિથને પાછળ છોડી દીધા છે. કોહલી અને સ્મિથના નામે ટેસ્ટમાં 27 સદી છે જ્યારે રૂટના નામે હવે 28 ટેસ્ટ સદી છે. ફેબ 4ના ચોથા ખેલાડી કેન વિલિયમસને ટેસ્ટ ક્રિકેટમાં 24 સદી ફટકારી છે.
ટોસ હાર્યા બાદ પ્રથમ બેટિંગ કરતા ભારતે પ્રથમ દાવમાં ઓલઆઉટ થયા બાદ 416 રન બનાવ્યા હતા. આ ઈનિંગમાં ઋષભ પંત અને રવિન્દ્ર જાડેજાએ શાનદાર સદી ફટકારી હતી. પ્રથમ દાવમાં પંતે 146 અને જાડેજાએ 104 રન બનાવ્યા હતા.
416 રનના જવાબમાં ઈંગ્લેન્ડનો પ્રથમ દાવ 284 રનમાં સમેટાઈ ગયો હતો. જોની બેયરસ્ટોએ પ્રથમ દાવમાં શાનદાર સદી ફટકારી હતી. તેણે 140 બોલમાં 106 રનની ઇનિંગ રમી હતી. બીજી તરફ ભારત તરફથી સિરાજે 4 અને બુમરાહે 3 વિકેટ ઝડપી હતી.
ભારતે બીજા દાવમાં 10 વિકેટ ગુમાવીને 245 રન બનાવ્યા હતા. આ ઇનિંગમાં ચેતેશ્વર પૂજારાએ સૌથી વધુ 66 રનની ઇનિંગ રમી હતી. આ સાથે જ પંતે અડધી સદી ફટકારી હતી. વિરાટ કોહલી બીજી ઇનિંગમાં પણ નિષ્ફળ રહ્યો હતો.
ઇંગ્લેન્ડે બીજી ઇનિંગમાં 3 વિકેટના નુકસાને 378 રન બનાવીને છેલ્લી ટેસ્ટ જીતી લીધી હતી. રૂટે 142 રન બનાવ્યા અને બેયરસ્ટોએ 114 રનની અણનમ મેચ વિનિંગ ઇનિંગ્સ રમી. બંનેએ ચોથી વિકેટ માટે 269 રનની ભાગીદારી કરી હતી.
