જય જગન્નાથ/ઇસ્કોન મંદિર ખાતે 13મી રથયાત્રાનું આયોજન, તૈયારીઓ પૂરજોશમાં

દર વર્ષની જેમ આ વખતે પણ પાક્યા બીજના દિવસે અમદાવાદના પશ્ચિમ વિસ્તારમાં આવેલા ઈસ્કોન મંદિર દ્વારા રથયાત્રાનું આયોજન કરવામાં આવશે. ઇસ્કોન મંદિરની આ 13મી રથયાત્રા હશે. ઈસ્કોન મંદિરમાં રથયાત્રા પૂર્વે તૈયારીઓ પૂરજોશમાં ચાલી રહી છે. પરંપરાગત રીતે, રથયાત્રા પહેલા 400 ભક્તોએ ઈસ્કોન મંદિરની સફાઈ કરી હતી. આ પ્રકારની પરંપરાગત સફાઈ વિધિને ‘ગુંડિચા માર્જન’ તહેવાર કહેવામાં આવે છે. રથ પણ તૈયાર કરવામાં આવી રહ્યો છે. રથયાત્રાના એક દિવસ પહેલા એટલે કે તા. 30મી જૂન 2022ના રોજ ભગવાનનો ‘નેત્રમિલન’ ઉત્સવ ઉજવવામાં આવશે જેમાં ભગવાન શ્રી જગન્નાથ, ભાઈ બલદેવ અને બહેન સુભદ્રાજીના દર્શન ભક્તો માટે ખોલવામાં આવશે.

આગામી તારીખ 01/07/2022 ના રોજ ભગવાન શ્રી જગન્નાથ, ભાઈ બલદેવ અને બહેન સુભદ્રાજી 35 ફૂટ ઊંચા રથમાં બિરાજમાન થશે. ભગવાનના રથને વિવિધ રંગબેરંગી દેશી-વિદેશી ફૂલોથી શણગારવામાં આવશે. ઉપરાંત ભગવાન શ્રી જગન્નાથ, ભાઈ બલદેવ અને બહેન સુભદ્રાજીને નવા વસ્ત્રોથી શણગારવામાં આવશે.
રથયાત્રાના પ્રારંભ પહેલા ભગવાનને 56 આહુતિ અર્પણ કરવામાં આવશે અને ભગવાનની આરતી બાદ રથયાત્રાનો વિધિવત પ્રારંભ કરવામાં આવશે.

રથયાત્રા રૂટ

સાંજે 4:00 કલાકે રથયાત્રા બિલેશ્વર મહાદેવથી શરૂ થઈને શ્યામ ચાર રસ્તા, આનંદ નગર રોડ, પ્રેરણાતીર્થ દેરાસર, આનંદનિકેતન સ્કૂલ થઈ રામદેવનગરથી ઈસ્કોન મંદિરે પહોંચશે. શોભાયાત્રામાં 5 હજારથી વધુ નગરજનો જોડાશે તેવો અંદાજ છે. રથયાત્રા દરમિયાન 300 કિલો ખીચડી અને મગના પ્રસાદનું વિતરણ કરવામાં આવશે.

સમગ્ર રથયાત્રા દરમિયાન ઈસ્કોન મંદિરના ભક્તો મૃદંગ, કરતાલ જેવા વાદ્યો સાથે કીર્તન કરશે. તે જ સમયે, ઇસ્કોનના સ્થાપક, આચાર્ય શ્રીમદ એ.સી. ભક્તિવેદાંત સ્વામી પ્રભુપાદ લિખિત પુસ્તકોનું પણ વિતરણ કરવામાં આવશે.

સુરક્ષા વ્યવસ્થા હશે

શોભાયાત્રા દરમિયાન 150થી વધુ પોલીસકર્મીઓ તૈનાત રહેશે અને સમગ્ર શોભાયાત્રા પર ડ્રોન કેમેરાથી નજર રાખવામાં આવશે. શોભાયાત્રાનો પ્રારંભ સંત સવૈયાનાથ સમાધિના પૂજ્ય મહંત શંભુનાથજી મહારાજ અને રાજકીય મહાનુભાવો દ્વારા કરવામાં આવશે.

રથયાત્રા બાદ તમામ ભક્તો માટે ઈસ્કોન મંદિરમાં ભંડારાનું પણ આયોજન કરવામાં આવ્યું છે. સમગ્ર શોભાયાત્રાનું નેતૃત્વ ઈસ્કોન મંદિરના પ્રમુખ કલાનાથ ચૈતન્ય દાસ કરશે.