લેન્ડસ્લાઇડ, વાદળ ફાટવું, નદીઓ ઓવરફ્લો.., જેવી સ્થિતિએ રૌદ્ર સ્વરૂપ ધારણ કરતા ઉત્તરાખંડમાં 8ના મોત, અનેક લાપતા

ઉત્તરાખંડમાં બુધવારે સવારથી ભારે વરસાદને કારણે બે અલગ-અલગ જગ્યાએ વાદળ ફાટવાની ઘટનાઓ બની છે. ટિહરીના ઘંસાલીમાં વાદળ ફાટવાની ઘટના બની હતી. આ સિવાય કેદારનાથ પદયાત્રાના માર્ગ પર ભીમ બલી ગડેરા ખાતે વાદળ ફાટવાની ઘટના બાદ લગભગ 150 થી 200 લોકો ફસાયા છે.

ઉત્તરાખંડમાં છેલ્લા 24 કલાકથી સતત ભારે વરસાદ ચાલુ છે, જેના કારણે પહાડોથી માંડીને મેદાનો સુધી માત્ર પાણી જ દેખાય છે. સાથે જ કેદારનાથ રોડ પર ગૌરીકુંડમાં ભારે વરસાદને કારણે ગરમ તળાવ ધોવાઈ ગયું છે. સાવચેતીના પગલા તરીકે વહીવટીતંત્રે ગૌરીકુંડને ખાલી કરાવ્યું છે. હવામાન વિભાગે ઉત્તરાખંડના 7 જિલ્લાઓમાં ભારે વરસાદનું એલર્ટ જાહેર કર્યું હતું.

પહાડી વિસ્તારોમાં ભારે વરસાદને કારણે નદીઓ અને નાળાઓ ઉભરાઈ રહ્યા છે અને ગઇકાલે મોડી સાંજે ટિહરીના ભીલંગાણા બ્લોક વિસ્તારના નૌતાદ ટોકમાં ભારે વરસાદ અને વાદળ ફાટવાને કારણે નુકસાન થયું છે. અહીં વાદળ ફાટવાને કારણે એક હોટલ ધોવાઈ ગઈ હતી, જેમાં હોટલ માલિક સહિત ત્રણ લોકો લાપતા થઈ ગયા હતા. તેમાંથી બેના મૃતદેહ મળી આવ્યા છે અને યુવકને ઈજાગ્રસ્ત હાલતમાં બચાવી લેવામાં આવ્યો છે.

બીજી તરફ કેદારનાથ પદયાત્રાના માર્ગ પર ભીમ બલિના ગડેરામાં વાદળ ફાટવાની ઘટના થયા બાદ માર્ગ પર ભારે કાટમાળ અને પથ્થરો પડ્યા છે. લગભગ 30 મીટર ફૂટપાથ ખરાબ થઈ ગઈ છે અને આશરે 150-200 મુસાફરો ત્યાં ફસાયેલા હોવાનું કહેવાય છે. અકસ્માત બાદ રાહદારી માર્ગ પરનો વાહન વ્યવહાર બંધ કરી દેવામાં આવ્યો છે. હજુ સુધી કોઈ જાનહાનિના સમાચાર નથી. સતત વરસાદને કારણે કેદારનાથ ધામમાં મંદાકિની નદીનું જળસ્તર ઝડપથી વધી રહ્યું છે.

આ વિસ્તારોમાં વરસાદ સતત તબાહી મચાવી રહ્યો છે અને અત્યાર સુધી વરસાદના કહેરથી 8 લોકોના મોત થયા છે, જ્યારે 5 લોકો ગુમ છે. ટિહરીમાં વાદળ ફાટવાને કારણે ત્રણના મોત થયા છે. જ્યારે દેહરાદૂનમાં એક વ્યક્તિનું મોત અને એક વ્યક્તિ લાપતા થઈ હતી. ચમોલીમાં એક મહિલાનું મોત થયું તો હરિદ્વારમાં બે બાળકોના મોત થયા છે. હળવદની અને બાગેશ્વરમાં અલગ-અલગ ઘટનાઓમાં બે બાળકો ડૂબી જવાના સમાચાર તો નૈનીતાલમાં એક વ્યક્તિનું મોત થયું હતું.