કર્ણાટકના આગામી મુખ્યમંત્રી કોણ હશે તે અંગે કોંગ્રેસ હાઈકમાન્ડે હજુ સુધી કોઈ જાહેરાત કરી નથી. વિધાનસભાની ચૂંટણીના પરિણામો જાહેર થયાને ત્રણ દિવસથી વધુનો સમય થઈ ગયો છે, પરંતુ હજુ પણ મુખ્યમંત્રીના નામ પર મંથન ચાલી રહ્યું છે. પૂર્વ સીએમ સિદ્ધારમૈયા અને કર્ણાટક કોંગ્રેસના અધ્યક્ષ ડીકે શિવકુમારનું નામ સીએમની રેસમાં છે. જોકે, એવું કહેવામાં આવી રહ્યું છે કે આ રેસમાં સિદ્ધારમૈયાએ શિવકુમારને પાછળ છોડી દીધા છે.
કર્ણાટકના સીએમ બનશે સિદ્ધારમૈયા!
એવું કહેવામાં આવી રહ્યું છે કે સિદ્ધારમૈયા સીએમ બનશે. કોંગ્રેસ હાઈકમાન્ડ બુધવારે તેમના નામ પર મહોર લગાવી શકે છે. આ પછી, બેંગલુરુમાં ધારાસભ્ય દળની બેઠક બોલાવીને તેની ઔપચારિક જાહેરાત કરવાની પ્રક્રિયા પૂર્ણ કરવામાં આવશે.
શિવકુમારે રજૂ કર્યો દાવો!
મંગળવારે કોંગ્રેસ અધ્યક્ષ મલ્લિકાર્જુનના નિવાસસ્થાને મુખ્યમંત્રીના નામને ફાઈનલ કરવા માટે એક બેઠક બોલાવવામાં આવી હતી. મંગળવારે બપોરે બેંગલુરુથી દિલ્હી પહોંચેલા શિવકુમાર ખડગેને તેમના નિવાસસ્થાને મળ્યા હતા. સૂત્રોના જણાવ્યા અનુસાર, શિવકુમારે કર્ણાટક ચૂંટણીમાં સંગઠનની આગેવાનીથી પાર્ટીમાં આપેલા યોગદાનને ટાંકીને સ્પષ્ટપણે કહ્યું કે તેઓ મુખ્યમંત્રી પદના સ્વાભાવિક દાવેદાર છે. હવે કર્ણાટકના રાજકારણમાં તેમની સાથે નવી પેઢીનો સમય છે.
