ચક્રવાત મોચા ખતરનાક બની શકે છે: દક્ષિણ રાજ્યોમાં વરસાદની શક્યતા
હવામાન વિભાગે આશંકા વ્યક્ત કરી છે કે દક્ષિણપૂર્વ બંગાળની ખાડીમાં બનેલું લો પ્રેશર એરિયા ચક્રવાતમાં ફેરવાઈ શકે છે. આ ચક્રવાતી તોફાનને મોચા નામ આપવામાં આવ્યું છે. હવામાન વિભાગના જણાવ્યા અનુસાર, ચક્રવાત મોચા શરૂઆતમાં 11 મે સુધી મધ્ય બંગાળની ખાડી તરફ ઉત્તર-ઉત્તરપશ્ચિમ તરફ આગળ વધશે અને પછી બાંગ્લાદેશ, મ્યાનમારના કિનારા તરફ ઉત્તર-ઉત્તરપૂર્વ તરફ વળશે. જેને ધ્યાનમાં રાખીને માછીમારોને દક્ષિણ પૂર્વ બંગાળની ખાડીમાં ન જવા સૂચના આપવામાં આવી છે.
આ દરમિયાન 70 કિમી પ્રતિ કલાકની ઝડપે પવન ફૂંકાશે અને વરસાદની સંભાવના છે. હવામાન વિભાગે વધુમાં જણાવ્યું હતું કે ચક્રવાત મોચા આગળ વધતાં દક્ષિણના રાજ્યોમાં વરસાદની સંભાવના છે. આ સાથે હવામાન વિભાગે આજે આંદામાન અને નિકોબાર ટાપુઓમાં ભારે વરસાદની સંભાવના વ્યક્ત કરી છે.
હવામાન વિભાગે પશ્ચિમ બંગાળ, ઓડિશા અને આંધ્રપ્રદેશ માટે પણ એલર્ટ જાહેર કર્યું છે. વિભાગે નાના દરિયાઈ જહાજો અને માછીમારોને મંગળવારથી બહાર ન નીકળવા જણાવ્યું છે. તેને 12 મે સુધી આંદામાન અને નિકોબાર ટાપુઓ નજીક પર્યટન અને શિપિંગને મર્યાદિત કરવા અને તેની નજીકથી દેખરેખ રાખવા પણ કહેવામાં આવ્યું છે.
સોમવારે પશ્ચિમ બંગાળના મુખ્યમંત્રી મમતા બેનર્જીએ એક નિવેદન જારી કરીને કહ્યું કે ચક્રવાતથી ડરવાની જરૂર નથી. તેમણે કહ્યું કે જો કોઈ મુશ્કેલ પરિસ્થિતિ ઉભી થશે તો દરિયાકાંઠાના વિસ્તારોના લોકોને બચાવી લેવામાં આવશે.
