મોરબી બ્રિજ અકસ્માત કેસમાં નવો વળાંકઃ જયસુખ પટેલ હવે ફરાર આરોપી, 1200 પાનાની ચાર્જશીટ દાખલ
મોરબી ઝુલતા પુલ અકસ્માત કેસમાં ભાગેડુ આરોપી તરીકે જયસુખ પટેલનું નામ ઉમેરાયું છે. આ કેસમાં 1200 પાનાની ચાર્જશીટ દાખલ કરવામાં આવી છે.
મોરબી બ્રિજ અકસ્માત કેસમાં નવો વળાંક આવ્યો છે. કેસના 90 દિવસ પૂરા થવા પર તપાસ અધિકારીના નિવેદન સાથે 1200 પાનાની ચાર્જશીટ દાખલ કરવામાં આવી છે. આ કેસમાં ભાગેડુ આરોપી તરીકે જયસુખ પટેલનું નામ ઉમેરાયું છે. આ ઉપરાંત ચાર્જશીટમાં 10 આરોપીઓના નામ પણ લખવામાં આવ્યા છે.
શું છે મામલો?
30 ઓક્ટોબર 2022ના રોજ ઝુલતા પુલ તૂટી પડવાની ઘટના બની હતી
આ ઘટનામાં 135 લોકોએ જીવ ગુમાવ્યા હતા
અકસ્માત કેસમાં અત્યાર સુધીમાં 9 આરોપીઓની ધરપકડ કરવામાં આવી છે
ઓરેવા ગ્રુપના જયસુખ પટેલ સામે વોરંટ ઈશ્યુ થઈ ચૂક્યું છે
જયસુખ પટેલે આગોતરા જામીન માટે અરજી કરી હતી
આગોતરા જામીન અરજી મુલતવી રાખવામાં આવી હતી
મોરબી બ્રિજ મુદ્દે હાઈકોર્ટમાં સુનાવણી થઈ હતી
30 ઓક્ટોબરે મોરબીમાં એક મોટી દુર્ઘટના બની હતી. ઝૂલતો પુલ તૂટી પડતાં 135 લોકોનાં મોત થયાં હતાં. ત્યારબાદ 25મી જાન્યુઆરીના રોજ મોરબી બ્રિજ દુર્ઘટના મુદ્દે ગુજરાત હાઈકોર્ટમાં સુનાવણી હાથ ધરવામાં આવી હતી. જેમાં રાજ્ય સરકારે બ્રિજની હાલત અંગે કોર્ટમાં જવાબ રજૂ કર્યો હતો. દરમિયાન જયસુખ પટેલના વકીલે પણ કોર્ટમાં વળતર આપવાની તૈયારી દર્શાવી હતી. ગુજરાત હાઈકોર્ટે કહ્યું કે, સરકારે જરૂરી મોટા પુલનું કામ યુદ્ધના ધોરણે હાથ ધરવું જોઈએ.
મોરબીની દુર્ઘટના સંદર્ભે પોલીસે અજંતા-ઓરેવા ગ્રુપના માલિક જયસુખ પટેલ સામે ધરપકડ વોરંટ જારી કર્યું છે. આ ઉપરાંત પોલીસે જયસુખ પટેલ સામે લુકઆઉટ સર્ક્યુલર પણ બહાર પાડ્યો છે. એક પોલીસ અધિકારીએ જણાવ્યું હતું કે જયસુખ પટેલ છેલ્લા દોઢ મહિનાથી ધરપકડથી બચી રહ્યો હતો અને તેની પૂછપરછ માટે મોકલવામાં આવેલા તમામ સમન્સની અવગણના કરી હતી. ચાર્જશીટમાં ઓરેવા ગ્રુપના માલિક જયસુખ પટેલને આરોપી ગણવામાં આવશે. આગામી સપ્તાહે ચાર્જશીટ દાખલ કરવામાં આવશે.
એફએસએલ રિપોર્ટમાં મોટો છબરડો થયો હતો
ત્યારે આ મામલે મોરબીની સ્થાનિક કોર્ટમાં રજૂ કરાયેલા એફએસએલ રિપોર્ટમાં મોટો ધડાકો થયો છે. જેમાં સસ્પેન્શન બ્રિજના કેબલ અને બોલ્ટ કપાયેલા હોવાનું અને બોલ્ટ ઢીલા હોવાનું બહાર આવ્યું હતું, ઉપરાંત સિક્યોરિટી ગાર્ડને કોઈ ટ્રેનિંગ આપવામાં આવી ન હતી અને અકસ્માતના દિવસે એટલે કે 30 ઓક્ટોબરના રોજ 3165 ટિકિટ આપવામાં આવી હતી. આ અંગે ફરિયાદ પક્ષે પ્રિન્સિપાલ ડિસ્ટ્રિક્ટ એન્ડ સેશન્સ જજ પી.સી.જોષીની કોર્ટમાં પુરાવા રજૂ કર્યા હતા. પુલના સમારકામ માટે જવાબદાર એજન્સી સામે કલમ 304, 308 અને 114 હેઠળ ફોજદારી કેસ દાખલ કરવામાં આવ્યો હતો. ગૃહ રાજ્ય મંત્રી હર્ષ સંઘવીએ કહ્યું કે, સંપૂર્ણ તપાસ બાદ દોષિતો સામે કડક કાર્યવાહી કરવામાં આવશે.
