રાષ્ટ્રીય એકતા દિવસ 2022: સરદાર વલ્લભભાઈ પટેલ જયંતિ

સરદાર વલ્લભભાઈ પટેલ જયંતિ 2022 , એકતા દિવસ: દેશ 31 ઓક્ટોબરના રોજ લોખંડી પુરુષ સરદાર વલ્લભભાઈ પટેલની 147મી જન્મજયંતિ ઉજવશે. ભારતને આઝાદી મળ્યા પછી, સરદાર વલ્લભભાઈ પટેલે સમગ્ર રાષ્ટ્રને એકતાના દોરમાં જોડવામાં મહત્વની ભૂમિકા ભજવી હતી. આ જ કારણ છે કે વલ્લભભાઈ પટેલની જન્મજયંતિને દેશમાં રાષ્ટ્રીય એકતા દિવસ તરીકે ઉજવવામાં આવે છે. 2014માં પ્રથમ વખત રાષ્ટ્રીય એકતા દિવસની ઉજવણી કરવામાં આવી હતી.

સરદાર પટેલ આઝાદી પછી દેશના પ્રથમ નાયબ વડાપ્રધાન અને ગૃહમંત્રી પણ હતા. મોદી સરકાર ફરી એકવાર સરદાર વલ્લભભાઈ પટેલની જન્મજયંતિની ભવ્ય ઉજવણી કરવાની તૈયારી કરી રહી છે. સરદાર પટેલની જન્મજયંતિ પર વડાપ્રધાન નરેન્દ્ર મોદી પોતે ગુજરાતના કેવડિયાની મુલાકાત લેશે અને ત્યાં આયોજિત એકતા દિવસના કાર્યક્રમને સંબોધશે. સ્ટેચ્યુ ઓફ યુનિટી કેવડિયામાં જ આવેલી છે. આ સિવાય વડાપ્રધાન IAS પ્રોબેશનર્સને પણ સંબોધિત કરશે. ભારતીય સિવિલ સર્વિસની સાતત્યતા જાળવવામાં સરદાર પટેલ નિર્ણાયક વ્યક્તિ હતા.

સરદાર વલ્લભભાઈ પટેલનો જન્મ 31 ઓક્ટોબર 1875 ના રોજ ગુજરાતના નડિયાદમાં થયો હતો. તેઓ બેરિસ્ટર તરીકે ભણવા લંડન ગયા અને અમદાવાદમાં કાયદાની પ્રેક્ટિસ કરવા પાછા આવ્યા. મહાત્મા ગાંધીના વિચારોથી પ્રેરિત થઈને તેમણે ભારતના સ્વાતંત્ર્ય ચળવળમાં ભાગ લીધો હતો.

સરદાર વલ્લભભાઈ પટેલની 182 મીટર (597 ફૂટ) ઊંચી લોખંડની પ્રતિમા (સ્ટેચ્યુ ઓફ યુનિટી) ગુજરાતમાં નર્મદા પરના સરદાર સરોવર ડેમની સામે ઊભી કરવામાં આવી હતી. આ વિશ્વની સૌથી ઊંચી પ્રતિમા છે. તે 31 ઓક્ટોબર 2018 ના રોજ રાષ્ટ્રને સમર્પિત કરવામાં આવ્યું હતું. સ્ટેચ્યુ ઓફ લિબર્ટીની ઊંચાઈ માત્ર 93 મીટર છે.